Pasko kalbaryo alang kang Rama
CEBU, Philippines - Giangkon ni Cebu City Mayor Michael Rama nga hangtud karon nasakitan gihapon siya sa pagkasuspenso niya nga giatol sa panahon sa Pasko.
Apan matud ni Rama nga dili kini makaguba sa iyang espiritu sa pagdawat sa nahitabo ug ang iyang panerbisyo dili gyud mausab kay kini ang iyang gisaad.
Gihulagway ni Rama nga ang iyang Pasko adunay kauban nga kalbaryo.
“Ang kinabuhi sa tawo dili kanunay anaa sa ibabaw, dili sige pangwarta, dili sige og pangawat, dili sige og pangaway dili sige og intriga, dili sige og tinapulan, mata mo ug pasalamat sa Ginoo nga buhi pa ta,” matud ni Rama
Ang pagsugod sa Carbon Pasko sa nilabay nga napulo ka tuig giisip ni Rama nga iyang misyon sa paghatag og Pasko sa mga tawo nga naa matulog sa dalan.
Gipresentar usab ni Rama ang magsuon nga sila Jonard ug Jeraldyn kinsa giisip nga iyang anak sukad pa sa pagsugod sa Carbon Pasko.
Atol sa pagsuspenso ni Rama niadtong Huwebes mao usab ang pagkagawas ni Jonard sa prisohan.
Si Rama inubanan sa pipila ka department heads nitambong sa unang Misa de Gallo sa Carbon Pasko, ang ika-napulo karong tuiga. (BANAT NEWS)
- Latest
