Nasamdan sa pantog mokiha sa VSMMC
CEBU, Philippines - Gihikay na sa abogado ni Jermelyn Bactismo ang kasong administratiba ug kriminal batok sa doktor nga ni-opera niini sa Vicente Sotto Memorial Medical Center.
Si Bactismo, 23-anyos, nga taga Pitalo, Lungsod sa San Fernando, nireklamo human matud pa naapil sa pagkahiwa ang pantog atol sa caesarian operation dihang nanganak niadto’ng Nobiyembre 6.
Si Atty. Emmanuel Pacquiao, abogado ni Bactismo, una na’ng nipadala og demand letter sa tambalanan niadto’ng Disyembre 7 aron sa pagpangayo og danyos labot sa gidangatan sa iya’ng kliyente.
Nihatag og lima ka adlaw si Pacquiao kang Dr. Gerardo Aquino, ang hospital chief sa VSMMC, aron sa pagtubag sa suwat apan pakyas sa pagtubag sa demand letter.
Dismayado ang manlalaban hinungdan nga iya na nga giandam ang mga kasong dereliction of duty ug misconduct batok sa doktor nga ni-opera ug lakip ang damages batok sa VSMMC ngadto sa buhatan sa Ombudsman.
Plano ni Pacquiao nga palabyon lang una ang Pasko ug sa Enero na isang-at ang kaso tungod kay padayon pa usab kini nga nangolekta sa mga dokumento.
Samtang si Nonoy Mongaya, tigpamaba sa VSMMC, wala una mohatag og pamahayag sanglit wala pa sab siya kakita sa demand letter nga gipadala ni Pacquiao sa tambalanan ug iya pa kini’ng kompirmahon. (BANAT NEWS)
- Latest
