Sinulog ticket sugod na og kahalin
CEBU, Philippines - Human gibuksan sa publiko ang ticket sa Sinulog Grand Parade 2016, gatosan na ang nakapalit sa buhatan sa Sinulog Foundation Inc. sa Cebu City Sports Center.
Ang VIP ticket nagkantidad og P2,500, yellow ticket tag P1,200 ug yellow-pink ticket tag P1,000.
Matud sa executive director sa SFI, Ricky Ballesteros, nga wala pa nila gibaligya online ang mga tickets.
Sumala pa ni Ballesteros nga mas daghan ug kusog ang halin karon sa yellow tickets diin dili layo sa grand stand ang lugar.
Si Ballesteros nibutyag nga mosaka pa ang gidaghanon sa mga mamalitay og ticket ilabi na nga napanglantawan nila nga matag tuig mosaka gyud ang gidaghanon sa mga tawo nga mobisita sa Sugbo aron mosaksi sa Sinulog Grand Parade.
Naabtan sa Banat News si Gerard Toreteo nga nipalit og pito ka ticket nga tag P1,200 para sa iyang mga igsuon nga gikan sa Netherlands.
Gibutyag ni Toreteo nga sayo siya nipalit aron dili maaberya ang ila’ng mga plano atol sa kalihukan sa Sinulog.
Si acting Mayor Edgardo Labella sa iyang bahin nibutyag nga matag tuig aduna gyu’y kalambuan sa Sinulog hinungdan bisan og suspendido si Mayor Michael Rama, magpabilin gihapon kining chairman sa SFI ug magtinambayayongay sila isip siya representante sa kagamhanan sa siyudad ug si Rama sa SFI alang sa kalampusan ug kalambuan sa daku’ng kalihukan. (BANAT NEWS)
- Latest
