Nurse, tagtungod sa bata wa nagkasinabot

CEBU, Philippines - Gigamit sa kaatbang sa politika ang isyu sa mga namatay nga pasyente sa mga district hospitals. Kini sumala pa ni Gobernador Hilario Davide III human laing insidente sa pagkamatay sa upat pa ka buwan nga bata sa Barili District Hospital.

Matud ni Davide nga nagpaabot pa siya sa report gikan ni Dr. Cynthia Genosolango, hepe sa Provincial Health Office, kinsa nihimo sa imbestigasyon.

Ang gobernador nagkanayon nga ang insidente sa kamatayon bisan sa pribado’ng tambalanan mahitabo usab kini apan gihimoan kini og isyu sa iya’ng mga kaatbang sa politika.

“Panahon tingale kaniadto dunay nangamatay nobody took advantage, they did not make any political issue pero karon ila na’ng gigamit aron to put this administration down,” dugang ni Davide.

Ang provincial information officer sa Kapitolyo nga si Ethel Natera nibutyag nga ang hepe sa tambalanan nga si Dr. Jose de Leon nagkanayon nga ang nurse ug apohan sa bata nga si Nina Mari wala magkasinabot.

Nagtuo ang apohan nga ang oxygen mao’y nakapalisud og ginhawa sa apo hinungdan nga gitangtang ang oxygen sa ilong ni Bryan Dimote.

Ang apohan nipasangil nga wala sila atimana sa nurse tungod kay wala siya pamatia diha’ng iya’ng gitawag ug gisultihan nga naglisud og ginhawa ang iyang apo nga gitauran og oxygen.

Si Mari nipasangil nga nisamot og kalisud sa pagginhawa ang bata diha’ng gibalik ang oxygen hangtud nga nilagom na ug una pa nisulti ang nurse nga ibalhin sa Vicente Sotto Memorial Medical Center (VSMMC) ang bata tungod kay grabe na ang kondisyon niini. (Brenda D. Batuto/GMR)(BANAT NEWS)