Duna pa’y laing suspenso para ni Rama
CEBU, Philippines - Nagtuo gyud si Mayor Michael Rama nga sa dili pa mapupos ang duha ka buwan niya nga preventive suspension, palutsan na usab siya sa Malacañang og lain nga pagkasuspenso nga molungtad hangtud na sa adlaw sa eleksyon.
Matud ni Rama nga tinguha gyud sa Malacañang nga suspensohon siya sa katungdanan sa pagtuo nga makapahinay kini sa iya’ng kandidatura ug modaug ang iya’ng kaatbang nga si kanhi mayor Tomas Osmeña kinsa alyado sa Partido Liberal.
Gawas sa kaso nga gipasaka ni Labangon Barangay Kapitan Victor Buendia sa Malacañang kabahin sa pagguba sa median structure nga gimugna sa Katipunan Street, si Rama nag-atubang og laing kaso didto gihapon sa Office of the President.
Ang laing kaso ni Rama nga pending pa karon sa Malacañang mao ang kabahin sa pagpanghatag og tag P20 mil nga calamity assistance sa mga opisyal ug kawani sa City Hall diin ang siyudad nigasto og P84 milyones.
Ang hearing officer sa Department of Interior and Local Government (DILG) nga mao’y nag-imbestigar sa kaso nakahuman na sa ila’ng gimbuhaton ug gipaabot nga moduso na kini og rekomendasyon ngadto sa Malacañang.
Daghan ang nagtuo nga ang DILG morekomendar gyud og silot ngadto ni Rama tungod kay bisan ang Commission on Audit (COA) niluwat og legal opinion nga dili tukma ang gihimo sa mayor.
Ang complainant nga si Atty. Reymelio Delute niingon nga dili tinuod nga nabiktima sa linog ug bagyo’ng Yolanda kaniadto’ng 2013 ang mga kawani sa City Hall.
Gani bisan si Rama nitug-an sa mga reporters nga ang iya’ng P20 mil nga calamity assistance gigasto niya pagbayad sa iya’ng kuryente ug tubig sa MCWD. (Rene U. Borromeo)(BANAT NEWS)
- Latest
