Young nilabaw sa recount
CEBU, Philippines - Nilabaw og 238 botos si kanhi bise mayor Joy Augustos Young batok kang Bise Mayor Edgardo Labella kinsa nakakuha lang og 59 botos sa resulta sa una’ng 116 ka presinto sa Mayo 2013 nga eleksiyon nga subli’ng giihap sa Commission on Elections.
Hinuon ang protesta ni Young gi-atras na niadto’ng Hunyo 8, 2015 apan ang Comelec nimando nga ipadayon ang ihap nunot sa ila nakita’ng kalainan sa resulta sa eleksiyon.
Ang kamanduan sa Comelec giluwatan niadto’ng Nobiyembre 25, 2015 ug gipirmahan nila’ng Presiding Commissioner Christian Robert Lim, ug Commissioners Luie Tito Guia ug Ma. Rowena Amelia Guanzon.
Si Labella nilabaw lang og 184 botos batok ni Young hinungdan nga siya ang giproklamar sa City Board of Canvassers isip mananaug nga bise mayor sa Dakbayan sa Sugbo sa botos nga 203,267 batok kang Young nga may 203,083 botos. Ang naihap nga balota 20 porsiyento pa lang sa kinatibuk-ang presinto nga giprotestahan ni Young.
Apan alang kang kanhi mayor Tomas Osmeña wala na’y kapuslanan ang labaw ni Young batok ni Labella sanglit pila na lang ka buwan eleksiyon na.
Matud ni Osmeña nga si Young unta ang kasamtangang mayor karon nunot sa pagka-suspenso ni Mayor Michael Rama.
Nasayran nga lakip sa gisibog ni Osmeña ang iya’ng protesta batok ni Rama dungan kang Young.
Si Rama nilabaw og 6,376 botos batok ni Osmeña niadto’ng 2013 nga eleksiyon.
Si Rama ug Osmeña subli’ng mag-atbang sa pagka-mayor sunod eleksiyon samtang si Young magpapili sa pagka-konsehal. (Gregg M. Rubio ug Sheriza Mae R. Uy/GMR)(BANAT NEWS)
- Latest
