Strike way epekto sa mga pasahero

CEBU, Philippines - Walay epekto ug wala mangatanggong ang mga sumasakay sa tibuok adlaw nga lihok protesta kagahapon sa mga transport groups sa Dakbayan sa Sugbo.

Kini base sa assessment sa Cebu City Transportation Office (CCTO), Traffic Enforcement Agency of Mandaue (TEAM)ug sa City Traffic Management Service (CTMS) sa Lapu-Lapu City.

Matud pa ni Joy Tumulak, Operations Head sa CCTO wala gayud siya kadawat og mga kasikas gikan sa ilang mga sakop nga gipakatap ug daghan gihapon ang mga sakyanan ang namasahero.

Sumala pa ni Tumulak, wala gayud makadagan ang 15 ka mga Kaohsiung Buses nga giandam sa siyudad. Gani sa dakbayan sa Mandaue, wa makadagan ang giandam nilang mga sakyanan. Usa sa mga sumasakay nga si Tatay Sano kinsa kanhi usa usab ka driver nibutyag nga dili na kaayo mahaylo ang mga drayber sa mga lihok protesta.

Ilabi na karon nga panahon sa kapaskohan nga kusog kaayo ang sakay sa mga pasahero.

Si Julieto Flores, sa Cebu Provincial Bus Operators Association, nibutyag nga pabor siya nga wagtangon na ang mga gubaon na kaayo nga mga sakyanan, apan matud niya, kinahanglang hatagan og panahon ang mga operators sa jeepney nga makatigom aron makahunat usab sila pagpalit og bag-ong sakyanan.

Sa Mandaue, si Roger Paller ang Public Information Officer (PIO) sa kagamhanan sa maong dakbayan nagkanayon wa makadagan ilang giandam nga mga sakyanan aron mohatud-kuha sa mga matanggong nga pasahero.

Sa Dakbayan sa Lapu-Lapu, mokabat sa 600 ka pasahero ang nahatud sa ila’ng destinasyon sa giandam sa siyudad nga mga bus.(Rowena Capistrano, Romeo Limpangog ug Christell Fatima Tudtud/EIM)(BANAT NEWS)