Bagyong Nona motugpa sa Samar
CEBU, Philippines – Gimandoan ni Presidente Benigno Aquino III ang tanang ahensya sa gobiyerno lakip ang kapolisan, militar ug rescue units sa pag-monitor ug pagpangandam sa pagtugpa sa bagyong Nona nga gipaabot nga motugpa karong gabii (Lunes) sa Samar.
Si Presidential Communications Secretary Herminio Coloma Jr. mibutyag nga matag-karon ug unya nagsige og pangutana si Aquino sa sitwasyon gikan sa Pagasa ug sa National Disaster Risk Reduction and Management Council.
"Patuloy na masinsing sinusubaybayan ni Pangulong Aquino at ng Gabinete ang paghahanda para sa pagdating ng severe Tropical Storm Nona na nasa loob na ng Philippine area of responsibility," matud pang Coloma sa interview kaniya sa dzRB sumala pa sa report sa Philstar.Com.
Gialerto na usab ang tanang local government units ilabi na sa mga kalungsoran sa Northern Samar nga diin gibutang na sa Signal No.1 sugod kagahapon.
Ang lalawigan sa Sugbo mialerto na sa tanang kalungsoran sa amihanang bahin sa lalawigan nga diin naigo kaniadto sa bagyong Yolanda.
Ang NDRRMC ug ubang mga ahensya sa gobiyerno naghimo na og koordinasyon sa unsay ilang buhaton ug ang posibilidad nga pagpabakwit sa mga tawo ug relief operations kay gusto sa presidente nga ‘zero casualties’ gyud sa pagtugpa ug pagbiya sa bagyong Nona.
Ang bagyong Nona gikatahong padayong nagkakusog kagahapon sa udto samtang nagkaduol kini sa Samar-Bicol area. Ang bagyong Nona nga adunay international name nga Melor nasigpatan 565 kilometros sa sidlakang bahin sa Catarman, Northern Samar base sa alas-11 sa buntag nga advisory sa Pagasa.
Gibanabana nga moirog kini kasadpan-amihanang kasadpan 19 kilometros padung sa sidlakang bahin sa Catarman, Northern Samar sa mosunod nga 24 oras.
Apan posible usab kini molabay 65 kilometros sa amihanang bahin sa Romblon o ba kaha 150 kilometros sidlakang-habagatang sidlakan sa Calapan City sa Oriental Mindoro ugma sa buntag.
Nagdala kini og hangin nga 110 kilometers per hour (kph) duol sa tunga ug huros nga 140 kph. (BANAT NEWS)
- Latest
