Lending collector gitulis
CEBU, Philippines – Lain na usab nga lending collector ang gitulis sa duha ka wala pa hiilhing tulisan nga nagsakay og motorsiklo didto sa dalan M.L. Quezon, Barangay Casuntingan, dakbayan sa Mandaue sa miaging adlaw.
Si PO1 Jayson Quiñones sa Presinto 4 sa Mandaue City Police Office (MCPO) miila sa biktima nga si Adonis Sumaylo, 36-anyos nga collector sa Palm Finance Corporation sa dalan Katipunan, Labangon, dakbayan sa Sugbo.
Matud ni PO1 Quiñones nga gikan pa nga nangolekta si Sumaylo sa maong dapit ug paingon na unta kini nga mo-parking sa motorsiklo dihang ang duha ka wala hiilhing lalaki nga nagsakay og motorsiklo mition kaniya og armas.
Si PO1 Quiñones miingon nga nakalitan ang biktima pagkakita sa mga tulisan nga nagsul-ob og closed-type helmet ug nasakiyo gayud ang kinolektang salapi sa biktima apil ang iyang cellphone.
Ang duha ka tulisan wala na mag-angkas sa ilang pag-ikyas kay ang usa kanila miikyas gamit ang motorsiklo sa collector. – /RUB) (BANAT NEWS)
- Latest
