Masiao-swertres sa Minglanilla menos na
CEBU, Philippines – Ang hepe sa kapulisan sa Minglanilla nangangkon nga nimenus na ang “ilegal swertres” nga nag-operate sa lungsod tungod sa subsob nga pagpangronda sa nakalabay'ng semana.
Si Chief Inspector Franco Oriol niingon nga su’d sa tulo ka semana nila nga pagsige’g panakop sa ilegal nga swertres aduna sila’y napasirad-an nga 16 ka outlet.
Matud ni Oriol nga wala pa siya’y nadunggan nga ilegal swertres outlet nga nangabli pag- balik human sa ilang pagpangronda.
Hinuon nagtuo si Oriol nga ang mga operator og masiao-swertres mohimo gayud og tago-tago nga operasyon.
"Nimenus gyud pero dili kalikayan nga mo-resort na sila sa usher style sa pagpamaligya og numero," matud pa ni Oriol.
Iyang gipasabot nga magpadayon gihapon ang ilang pagpangronda kun makabantay sila nga namalik na usab ang ilegal nga swertres sa Minglanilla.
Gipasalamatan ni Oriol ang mga opisyal sa kabarangayan nga maoy nakatabang kanila pagsumpo sa ilegal nga outlet sa swertres. – /RUB) (BANAT NEWS)
- Latest
