Gisugdan na pag-ayo ang Mactan-Mandaue bridge
CEBU, Philippines – Gisugdan na ang pag-ayo sa Mactan-Mandaue Bridge apan giuna pa ang ilawom nga bahin sa taytayan aron dili maapektahan ang kalihukan sa International Eucharistic Congress karong Enero.
Ang pag-ayo sa taytayan sugdan na unta sa miaging buwan apan gikabalak-an nga makabalda kini sa kalihukan sa Eucharistic Congress kay makapasamot man kini sa problema sa trapiko.
Bisan si Lapu-Lapu City Mayor Paz Radaza miawhag gyud nga ioktaba ang pag-ayo sa Mactan-Mandaue Bridge.
Si Engineer Raymond Cataluña sa Department of Public Works and Highways (DPWH) 7 miingon nga gitan-aw nila nga dili makabalda sa mga dagkong kalihukan ang pag-ayo sa taytayan.
Ang planning and development officer sa Mandaue nga si Florentino Nimor Jr. nangagpas nga makasinati gyud og grabeng problema sa trapiko kun dunganon ang road repair sa A. Soriano Avenue sa Mandaue ug ang pag-ayo sa taytayan.
Mokabat sa P129.6 milyones ang gigahin sa nasudnong kagamhanan alang sa pagpasemento sa A. Soriano ug dalan Plaridel ug P50 milyones usab ang gigahin sa pag-ayo sa taytayan.
Si Glenn Antigua nga maoy executive officer sa Traffic Enforcement Agency of Mandaue (TEAM) miingon nga mopatuman sila og truck ban sa nahisgotang mga karsada aron sa pagpaluag sa trapiko.
Pagka karon gani bisan og wala pa ang maong road projects dugay ra nga ang Mandaue nakasinati og problema sa trapiko. – /RUB) (BANAT NEWS)
- Latest
