“Bao-bao” gipanguha na gyud sa karsada

CEBU, Philippines – Nahuman-human na sa pagpanangtang ang mga sementado nga road separators nga gitawag sa uban og “bao-bao” nga sagad gibutang taliwala sa mga karsada dinhi sa dakbayan sa Sugbo.

Kaniadtong miaging semana, hingpit na nga gitangtang sa Cebu City Transportation Office (CCTO) ang mga “bao-bao” nga gipamutang taliwala sa karsada sa eskena Gorordo Avenue ug Salinas Drive, nga nailang “JY.” Ang kamandoan pagpatangtang sa mga “bao-bao” gihimo kaniadto nga wala pa masuspenso sa katungdanan si Mayor Michael Rama.

Gitan-aw ni Rama nga ang pagtangtang sa mga “bao-bao” nga nagsilbe nga road separators makatampo sa pagpahapsay sa dagan sa mga sakyanan.

Matud ni Rama nga kun wala ang sementado nga road separator, mahimong dali ra nga maka-adjust ang mga traffic enforcers kun asa nga bahin sa karsada ang palapdan kay daghan ang moagi.

Gipasabot ni Rama nga kun panahon sa buntag, ang daghang sakyanan mopaingon dinhi sa downtown area mao nga angay’ng mas lapad nga bahin sa karsada ang itagana sa mga sakyanan ug gamay lang sa pikas.

Apan inigkahapon nga mas daghan na usab ang mga sakyanan nga mopaingon sa lainlaing dapit sa dakbayan kay mamauli ang mga tawo, balihon na usab ang sitwasyon. (BANAT NEWS)