Unom ra ka punoan ang ipalarot
CEBU, Philippines – Gipangayoan na sa Department of Environment and Natural Resources (DENR)-7 ang Archdiocese of Cebu og komentaryo kun unsay ilang baruganan labot sa tinguha sa Cebu City Government nga ipatangtang ang 16 ka mga punoan sa kahoy sa dalan Pope John Paul Avenue.
Nasayran nga ang DENR-7 mi-endorsar na sa earth-balling permit nga request sa kagamhanan sa siyudad sa Sugbo ngadto sa ilang ulohang buhatan, human kini maka-comply sa mga gikinahanglan nga rekisitos.
Apan nagkanayon si Bishop Dennis Villarojo, Secretary General sa International Eucharistic Congress (IEC) 2016 nga supak siya sa pagpatangtang sa tanang mga punoan nga gilangkuban sa 11 ka mga fire trees ug lima ka punoan sa mahogany.
Matud niya nga kadtong unom ka mga punoan lang sa kahoy nga maapektuhan sa pag-transfer sa gate sa semenaryo ang ilang gipangayoan og request nga ipatangtang.
Hinoon, wala pa makabasa si Villarojo sa suwat gikan sa DENR-7 labot niini.
Kahinumduman nga hagbay na nga plano sa siyudad ang pagtangtang sa maong kahoy alang unta sa ilang pagpahigayon og road widening sa maong dapit.
Una na usab gibutyag sa ahensiya nga walay mga representante gikan sa Simbahan, Civic Organizations ug Environmental Groups nga nitambong sa gihimong public consultation sa dakbayan.
Ang Barangay Luz pa lang usab ang nakaduso og certification of no opposition samtang wala pa maka-isyu niini ang Barangay Kasambagan nga apektado usab niini, ug endorsement gikan ni DPWH Secretary Rogelio Singson. – /EIM) (BANAT NEWS)
- Latest
