P1M na nagasto sa nadasmagan nga maestro

CEBU, Philippines - Niabot na og kapin sa P1 ka milyon ang bayranan sa ospital niadto’ng maestro sa Banilad Elementary School nga nadasmagan sa sakyanan sa Cebu City Hall nga giisyu kang Konsehal Richie Osmeña.

Si Junrey Postis Sanchez, 39, taga Barangay Bacayan, Dakbayan sa Sugbo, gidala sa Chong Hua Hospital human kini nadam-agi sa sakyanan nga gimaneho ni Ronald Badajos niadto’ng Septiyembre 11.

Matud ni Osmeña nga ang Dakbayan sa Sugbo andam nga motubag sa iya’ng kaakuhan sa pagpatambal sa biktima sanglit ang Innova nga nakadam-ag gipanag-iya man sa siyudad.

Ubos sa lagda sa City Hospitalization Assistance and Medical Program (CHAMP), ang usa ka molupyo sa dakbayan maka-avail lang og financial assistance hangtud sa P25 mil.

Apan matud ni Osmeña nga inig balik niya gikan sa Conference on Climate Change sa Paris, France, makigtagbo siya sa tagtungod sa biktima.

Si Sanchez motabok unta sa karsada atubangan sa Banilad Elementary School diha’ng nadasmagan sa sakyanan nga nagpaingon sa downtown. Adunay mga nakasaksi nga nitug-an nga si Sanchez wala mosubay sa skywalk ug direkta kini nga nilabang sa karsada mao nga naigo siya sa sakyanan.  (BANAT NEWS)