Mga lider sa kapilya gigamit sa vote buying

CEBU, Philippines - Mga political organizers sa mga politiko sayo pa nagsugod og pagpanglista ug nitapok sa mga botante sa nagkadaiyang barangay sa tinguha nga paliton ilang mga boto ug ang mga nagpasiugda niini naglakip usab sa mga lider-lider ug aktibong opisyales sa mga kapilya sumala pa sa Dilaab Foundation Inc.

Kini maoy gibutyag ni Mayren Cogtas, usa sa mga gitahasan sa Dilaab Foundation sa paghimo og house-to-house campaign kontra sa vote buying ug responsableng pagbotar sa umaabot nga 2016 Elections.

Matud pa ni Cogtas, atol sa ika-41st Cebu Citizens Press Council quarterly meeting sa Marcelo V. Fernan  Press Center kagahapon, gawas sa pagduaw sa kabalayan ug pakiglambigit sa mga tawo naghimo usab sila og mga pulong-pulong.

Apan nakugang sila human ilang nahibaw-an gikan mismo sa mga tawo sa ilang pilot areas nga naunhan na sila sa mga kandidato ug gani daw nakigribal na kanila  ang kalainan lamang, kwarta ang ilang gipanghaylo samtang ang Dilaab, konsensiya ug matinud-anong limpyo nga piniliay alang sa kaugmaon sa nasud.

Sumala pa nga gigamit na sa mga kandidato ang chapel networks alang sa  ilang politikanhong ambisyon.

Matud pang Cogtas, dihang ilang gibalikan ang maong pilot areas, giingnan sila nga nauwahi na sila sa ilang kampanya kay ang mga tawo nalista na man sa mga grupo nga gikatakdang modawat og bayad bugti sa ilang botos sa 2016 Elections.

Sumala pa nga ang uban sa mga nalista mga kabataan pa ug niangkon nga ang ilaha mismong mga ginikanan maoy nagtudlo kanila kinsay suportahan bugti sa ilang boto.

Aduna hinuoy pipila sa mga ‘nalista’ na nga kabataan ang nakig-estorya og balik sa ilang mga ginikanan ug sa mga ‘lider-lider’ aron tangtangon ilang pangalan sa listahan human sila naestoryahan sa Dilaab volunteers.

Base sa pagtuon sa Dilaab sa milabay nga piniliay, ang mga botanteng nag-edad og 18 hangtud 35 anyos nga ilang naestoryahan ug nisaad nga di mobaligya ilang boto tinud-anay gyud nga nihimo sa ilang panaad. Si Dilaab Foundation Inc. Executive Director Carmelo Diola miklaro hinuon nga dili kaparian maoy nag-organisar niining mga kalihokan sa mga opisyales sa mga kapilya nga nalambigit niining vote buying.

Gitug-an usab ni Diola nga niadtong 2013 Elections, ang Cebu maoy kinadaghanan og naaresto nga nalambigit sa vote buying apan wala na siya makadungog kun unsay nahitabo sa maong mga kaso.  (BANAT NEWS)