Rama suspendido na

CEBU, Philippines - Gikondenar sa 60 kapin ka mga kapitan sa barangay sa dakbayan sa Sugbo nga mayoriya kaalyado sa Team Rama ang pagpahamtang sa preventive suspension sa Office of the President batok ni Mayor Michael Rama.

Naghugpong kagahapon sa hapon ang mga kaalyado ni Rama nga gipangulohan ni Barangay Kapitan Philip Zafra nga mihulagway nga klaro kaayo nga politikanhon nga paglutos ang gibuhat sa mga kaatbang sa mayor.

Sumala pa ni Zafra desperado na ang ilang kaatbang  nga wala nila hinganli apan dayag na sa tanan nga ang gipasabot niini way lain mao ang partido sa Bando Osmeña Pundok Kauswagan.

Gibutyag usab ni Kapitan Joel Garganera sa Barangay Tinago nga padayon nilang suportahan si Rama kinsa nihimo lang sa iyang trabaho subay sa balaod.

Dili usab motuo ang mga kapitan nga si Buendia lang maoy nilihok niini ngadto sa Malacañang aron banggaon si Rama.

Kagahapon sa buntag hinpit nga gihatud sa DILG ang suspension order sa buhatan sa mayor kinsa kasamtangan pa nga on-leave.

Ang kamandoan gipaskin ni DILG-7 regional director Rene Bordeus kauban ang legal officer niini diha sa pultahan sa buhatan sa mayor.

Tungod niini, sugod kagahapon si Vice Mayor Edgardo Labella na ang molingkod isip acting mayor sa dakbayan, apan bisan si Labella wa diha sa iyang buhatan atol sa pag-abot sa DILG.

Matud ni Burdeos nga bisan pa wala’y nidawat sa order opisyal ug epektibo na ang suspension order ni Rama kagahapon. Dugang pa ni Burdeos nga kun dili dawaton ni Labella ang appointment isip acting mayor magpahigayon og reelection.

Samtang si City Administrator Dr. Lucelle Mercado mipasalig nga magpabilin nga normal ug dili maapektuhan ang serbisyo alang sa katawhan bisan pa suspensuhon ang mayor.

Samtang gihangop ni Barangay Kapitan Victor Buendia ang preventive suspension kang Rama tungod kay naigo kini sa “Matuwid na Daan” ni Presidente Benigno Aquino III.

Sumala pa ni Buendia nga klaro kaayo nga pagusik-usik sa kwarta sa magbubuhis ang gihimo ni Rama pagguba sa iyang proyekto nga mao ang center island diha sa dalan Katipunan.

Ang mayor mipatangtang niini kay nakatampo kini sa kahuot sa trapiko  ug ang mismong Cebu City District Engineering Office miingon nga nakalapas sa Philippine Highway Act ang maong “median structure” (center island) kay peligro kini sa mga motorist.

Nag-ampo si Buendia nga dawaton sa mayor ang kasaypanan ngadto sa mga taga Labangon.

Si Archbishop Jose Palma sa iyang bahin nakurat sa suspension order ni Mayor Michael Rama ug nasubo kini ilabi na nga aktibo kini sa mga kalihukan sa IEC.

 “We were surprise that Mayor Mike was suspended, on my part, tungod sa iyang active involvement we felt sad that it has to happen at this time," matud pa ni Palma. Si Rama mitambong kagahapon sa pagbukas sa Robinsons Galleria apan nagdumili kini paghatag og pamahayag bahin sa suspensyon.  (BANAT NEWS)