Templete sa SRP giayo alang sa IEC

CEBU, Philippines - Nagpadayon hangtud karon ang pagpadaku sa altar sa templete sa South Road Properties ug clearing operation sa lugar subay sa nagsingabot nga International Eucharistic Congress sunod buwan. Ang chairman sa Venues Committee, Fr. Brian Brigoli, nibutyag nga padayon ang trabaho sa lugar diin ipahigayon ang katapusang misa sa IEC ug nagtambaya-yongay karon ang kagamhanan ug mga private firms alang sa pag-restore ug pagpalapad sa lugar diin daghan na unya’ng mga dagku’ng opisyal sa simbahan ang masulod sa altar. Sumala pa ni Brigoli nga usa sa mga hagit nga ila’ng giatubang karon mao ang kalit-kalit nga pag-usab sa lakat sa panahon ug malaumon nga duha ka semana sa dili pa ang IEC mahuman na ang construction sa mao’ng lugar. Gitug-an ni Brigoli nga kinahanglan gyud nga mogasto alang sa pagpadaku sa lugar nga mahimo’ng magamit sa mao’ng international nga kalihukan apan iya’ng gipaneguro nga tanan kutob sa magamit ila’ng gigamit pagbalik ug gipaneguro usab niya nga wala sila mag-usik-usik sa kwarta sa simbahan. (BANAT NEWS)