CHR-7 moimbestigar sa “torture” sa mga suspek

CEBU, Philippines - Personal nga giadto sa Commission on Human Rights (CHR)-7 ang Lungsod sa Dumanjug aron paghimo og imbestigasyon kalabot sa pasangil nga gikulata kadtong mga suspek sa pagpamanhig kang Bise Mayor Efren Gica sa miaging semana.

Nagkanayon si Leo Villarino, OIC Investigator sa CHR-7 dunay reklamo nga midangat sa ilang buhatan labot sa matud pa gihimong pagpangulata ni Gica uban sa usa sa mga konsehal niini ngadto sa tulo ka mga dinakpan nga nasikop niadtong Sabado nga giingong maoy responsable sa pagpamanhig kanila diha sa Barangay Masa.

Matud pa ang pagpangulata didto nahitabo sa sulod sa police station. Ang mga “gikulata” mao sila si Samuel Villagonzalo Jr., Joselito Quirante ug Dexter Aniñon kinsa nagtingkagol karon sa prisohan.

Gibutyag ni Villarino, tumong sa ilang pag-adto mao ang pagtubag sa awhag ni Mayor Nelson Garcia ug kanhi kongresista Pablo “Pabling” Garcia kalabot sa impormasyon nga ilang gihatag ngadto sa ahensiya nga giingong gikulata ang mga dinakpan sulod sa police station. Apan dihang gikuhaan sa iyang habig si Vice Mayor Gica kalabot sa maong alegasyon mihimakak kini sa pasangil. Matud niya wala siya kakita sa maong mga dinakpan ug wala usab siya kahikap ug ang tanan binuhatan sa iyang kaatbang sa politika. Giklaro niya nga ang CHR-7 dili manginlabot sa kasungian sa politika sa Dumanjug kay dili kini kabahin sa ilang trabaho. (BANAT NEWS)