Mga polis i-deploy pag-abli sa Robinson’s Galleria

CEBU, Philippines – Sama sa pag-abli sa dakong mall sa South Road Properties, mohimo usab og susamang higpit nga seguridad ang kapulisan sa dakbayan sa Sugbo atol na unya sa pag-abri sa Robinson’s Galleria diha sa General Maxilom Avenue Extension karong petsa 10 ning bulan sa Disyembre.

Kini maoy gitug-an ni Senior Superintendent Marciano Batiancela, officer in-charge sa Cebu City Police Office human nga nakadawat sila og suwat gikan sa tagdumala sa maong mall bahin sa ilang pagpangabli.

Si Batiancela miingon nga usa sa ilang tutukan mao ang mga “petty crimes” tungod sa pagsugwak sa mga tawo sa maong lugar.

Ang Waterfront ug Mabolo Police Station ang nag-unang buhatan nga mobantay sa maong dapit.

Sumala pa ni Batiancela ang Traffic Patrol Group (TPG) apil sa motabang sa paghapsay sa lugar ilabi na sa dagan sa trapiko.

Ilaha na usab kining apilon sa ilang mga pagpangandam sa seguridad sama sa gihimo nila sa ubang mga dapit sa siyudad. Sa gihapon subli nga nagpahimangno ang kapulisan sa CCPO sa katawhan nga kun mobisita sa maong mall , likayan gyud ang pagdala sa mga mahalong alahas, gadgets ug daghang  kwarta aron dili matintal ang mga badlungon. – /EIM) (BANAT NEWS)