P30T nga bonus sa kawani sa City Hall aprobado na

CEBU, Philippines - Ang mga kawani sa kagamhanan sa dakbayan sa Sugbo nga nakaserbisyo na og subra sa upat ka buwan makadawat gyud og tag P30 mil nga Christmas bonus.

Kini human nga gipasar sa Cebu City Council kagahapon ang kapin P201 milyones nga Supplemental Budget-2 atol sa gipahigayon nga special session.

Upat ka konsehal nga pulos alyado sa Bando Osmeña Pundok-Kauswagan (BOPK) ang modawat lang og tag P10 mil kay gihulagway nila nga dako ra kaayo ang P30 mil nga bonus.

Sila mao si Konsehal Margarita Osmeña, Alvin Dizon, Leah Japson ug Mary Ann delos Santos. Ang ubang konsehal modawat gyud og tag P30 mil kada usa.

Ang dakbayan sa Sugbo mogasto og P127 milyones sa paghatag lang og bonus nga tag P30 mil sa matag kawani. Apil sa gipasar nga Supplemental Budget 2 mao ang garbage tipping fee.

Matud ni Konsehal Osmeña nga ang orihinal nga gisugyot nga garbage tipping fee P55 milyones, apan sanglit hinapos na man ang tuig P40 milyones lang ang ilang giaprobahan.

Sa wala pa ipasar ang budget, si Konsehal Osmeña mikuwestiyon ngano nga P30 mil man ang ipanghatag nga bonus nga ang dakbayan wala pa gani makahatag og hinabang sa mga nabiktima sa sunog.

Apan si City Treasurer Diwa Cuevas miingon nga andam kanunay ang kwarta para sa paghatag og hinabang sa mga biktima sa sunog kun mahitsas na ang dokumento.

Ang pagpanghatag sa P30 mil nga bonus gikatakda nga himoon sa dili pa mahuman karong semanaha. (BANAT NEWS)