‘Barrio Fiesta’ andamon sa iec youth day
CEBU, Philippines - Andaman og “barrio fiesta-themed” nga welcome dinner ang mokabat 5,000 ka delegado sa Youth Day atol sa International Eucharistic Congress 2016 nga ipahigayon sa Dakbayan sa Lapu-Lapu karong Enero 27.
Si Andy Berame sa City Disaster Risk Reduction and Management Council nagkanayon nga adunay pinili nga delegado ang sagupon sa unom ka parokya sa dakbayan samtang ang welcome dinner himuon sa tulo ka venues sa dakbayan. Ang event proper sa IEC Youth Congress himuon sa Hoopsdome sa Enero 28 ug sa hapon ang procession nga gitawag og “Jericho Walk” nga moagi sa Mandaue-Mactan Bridge padulong sa Mandani Bay sa North Reclamation Area sa Dakbayan sa Mandaue.
“Last namo’ng meeting didto sa Pavillion with the youth committee, wala pa gyud mi detalye, nga unsaon nato paghimo sa walk ba kay mao man na’y crucial gud. Ang diha sa Hoopsdome, dali ra i-manage,” matud ni Berame.
Matud ni Berame nga katunga sa lane ang ila’ng gamiton alang sa “Jericho Walk” ug posible’ng magbutang og marshalls alang niini.
Samtang matud usab ni Berame nga adunay proposal ang Department of Education nga himuong holiday atol sa kalihukan apan wala pa’y final nga desisyon ug mag-agad sila sa mando ni Mayor Paz Radaza. (Christell Fatima M. Tudtud/GMR)(BANAT NEWS)
- Latest
