Motor mosubay sa bicycle lane dakpon

CEBU, Philippines - Dakpon ang mga motorsiklo nga mosubay sa bicycle lane sa Dakbayan sa Mandaue sa higayon nga mahingpit na gyud ang pagpatuman niini.

Kini ang gipahibawo ni Glenn Antigua, executive officer sa Traffic Enforcement Agency of Mandaue (TEAM) nga nahinnabi sa Banat News.

Biseklita lang ang tugutan nga makasubay sa bicycle lane gikan sa City Hall subay sa dalan Sotero B. Cabahug paingon sa Ibabao-Estancia.

Si Antigua niingon nga kadaghanan sa mga motorista gusto gyud nga makauna sa paglusot sa higayon nga maghuot ang mga sakyanan sa dalan ug daku ang kahigayunan nga adto kini mosubay sa bicycle lane.

Ang madakpan makamulta og P200.

Si Architect Florentino Nimor, city planning officer ug sakop sa traffic board, nipadayag nga dili lang ang paghatag og kasayon sa mga biseklita nga molabay sa dalan ug pagpakita usab sa pagpanalipod sa kalikupan.

Karong Disyembre 15 gikatakda ang pagsubo sa proyekto. (Romeo T. Limpangog/GMR)

Pag-oktaba sa pag-ayo sa taytayan di makaayo

Gikabalaka ni Mandaue City Planning Officer, Architect Florentino Nimor, ang pag-oktaba sa pag-ayo sa Mactan-Mandaue Bridge tungod kay makadugang kini sa nasinati nga suliran sa trapiko.

Kini ang iya’ng gipadayag isip reaksiyon sa awhag ni Mayor Paz Radaza sa Dakbayan sa Lapu-Lapu nga ipa-oktaba ang pag-ayo sa taytayan.

“Daku na nga problema sa trapiko sa Dakbayan sa Mandaue ug moepekto usab kini sa Dakbayan sa Lapu-Lapu kun magdungan na hinuon ang pag-repair sa Mactan-Mandaue Bridge ug ang pagsemento sa dalan Plaridel ug Ouano Avenue,” ni Nimor pa sa iya’ng pamahayag.

Gipasabot ni Nimor nga alang kaniya labi’ng maayo gyud nga sugdan na lang pag-ayo ang taytayan aron kun mahuman na, mao na usab ang pagpadayon sa road concreting sa Ouano Avenue sa reclamation area ug dalan Plaridel.

Matud ni Nimor nga ang road concreting lang sa nahisgutan nga mga dalan ang ila’ng gihangyo sa DPWH-7 nga ma-oktaba sa paglikay nga mograbe pa ang huot sa trapiko sa Dakbayan sa Mandaue ug Dakbayan sa Lapu-Lapu.

Duha ka dagku’ng kalihukan sa Enero sunod tuig ang himuon sa Sugbo sama sa International Eucharistic Congress ug ang Sinulog Festival 2016.

Hinuon si Nimor nipasabot nga ila’ng gikasabutan sa panagtigum sa kadagkoan sa DPWH-7 ang pagpatuman sa one lane traffic scheme ug niini ang mga sakyanan nga padulong sa Lapu-Lapu sa buntag ang makaagi ug sa hapon ang mga sakyanan nga padulong sa Mandaue mao na usab ang makaagi sa taytayan. (Romeo T. Limpangog/GMR)(BANAT NEWS)