Kwestyonable nga savings

CEBU, Philippines - Ang kagamhanan sa dakbayan sa Sugbo maka-hire pa unta og daghang traffic enforcers aron pagpahapsay sa trapiko ug mga City Health personnel nga makaatiman sa panglawas sa katawhan apan ang budget niini wala gastoha ug karon gamiton nga kabahin sa pagpanghatag og P30 mil nga bonus sa mga kawani sa City Hall.

Moabot og P127 milyones ang kantidad nga magamit sa pagpanghatag og tag P30 mil nga Christmas bonus sa matag kawani sa City Hall kun ang gisugyot sa Executive Department uyonan sa mga sakop sa Cebu City Council.

Daghan hinuon ang nagtuo nga dili kini supakon sa mga konsehal ang paghatag og dako nga kantidad sa bonus tungod kay apil sila nga mga sakop sa konseho ang makadawat niining mao nga kantidad.

Base sa dukomento nga gisumiter sa Local Finance Committee ngadto sa City Council, adunay “savings” nga P8.3 milyones gikan sa Cebu City Transportation Office, kanhi CITOM, nga gitagana unta sa pagsweldo og mga kawani sa maong departamento.

Kanunay gibalikbalik sa kadagkoan sa CCTO nga kuwang kaayo ang dul-an sa 300 nila ka traffic enforcers nga ikatag-katag sa pagdestino sa lainlaing dapit sa dakbayan aron mopatunhay sa dagan sa mga sakyanan.

Duna ‘say dul-an sa P4.5 milyones nga gitagana unta sa pagpamalit og Reflectorized Thermoplastic Pavement Markings aron ilisan na ang mga hanap na kaayo nga markings diha sa mga karsada apan wala kini gastoha.

Ang laing kapin sa P2.9 milyones gikan usab kini sa “savings” sa wala nila pag-hire og dugang mga kawani sa City Health Department-Field nga makapalambo unta sa health services sa mga molupyo dinhi sa dakbayan.

Si Konsehal Margarita “Margot” Osmeña, pangulo sa Committee on Budget and Finance sa konseho, miingon nga mopahigayon sila og sesyon karong Lunes aron diskutihon ang gisugyot nga P206 milyones nga Supplemental Budget No. 2.

Nakabantay si Konsehal Osmeña nga samtang ang Executive Department nangusog gyud nga kagahinan sila og budget alang sa pagpahigayon og tax mapping operations aron mosaka ang koleksyon sa buhis, apan adunay P1 ka milyon nga para niining maong proyekto nga wala gastoha.

Wala ‘sab gastoha ang P500 mil nga budget nga gitagana alang sa pag-examine sa mga books of accounts sa mga balay-patigayon aron masakpan unta kun kinsa kadtong wala magtug-an sa tinuod nila nga kinitaan.

Duna ‘say P2 milyones nga “savings” ug alang unta kini sa medical assistance program sama sa health insurance ug bayad sa mga botika nga wala gigasto.

Samtang ang mga opisyal sa City Hall miingon nga naghinobra na ang pag-hire nila og mga tinun-an alang sa gitawag og Special Program for Employment of Students (SPES), nahibaw-an nga duna diay P2 milyones nga budget nga wala gihapon gigasto.

Kun aprobahan ang paghatag og tag P30 mil nga bonus sa matag kawani sa City Hall, karon pa sukad-masukad nga ang dakbayan mihatag og labing dako nga kantidad nga bonus sa mga kawani.  (Rene U. Borromeo)(BANAT NEWS)