Suspek sa ‘bubble gum style’ nasikop

CEBU, Philippines - Nasikop sa kapolisan ang giingong notado’ng kawatan sa Siyudad sa Talisay human nakabiktima og factory worker samtang sakay sa pasaheroang jeep sa Mananga, Tabunok niadto’ng Miyerkules sa buntag.

Ang nasikop nailhan nga si Rodulfo Mancao, 40-anyos, minyo nga nagpuyo sa nahisgutang lugar ug lumad nga taga Siyudad sa Davao. Si SPO1 Mikie Espina sa Talisay City Police Station niingon nga nidangop sa ila’ng buhatan si Sheila Lyn Matuguinan Recta, 26, dalaga nga taga Kinasang-an, Pardo, Cebu City kinsa gikuotan.

Padulong unta motrabaho ang biktima sakay sa pasaheroan nga multicab paingon sa Lungsod sa Minglanilla diha’ng duha ka lalaki ang nagpaka-aron ingnon nga pasahero ang nitawag sa iya’ng atensiyon nga adunay bubble gum sa iya’ng buhok hinungdan nga iya kini’ng gihinay-hinay og kuha. Apan ang duha ka lalaki ang hinay-hinay sab nga nihinol sa iya’ng bag ug nakuha gyud ang cellphone nga mobalor og P35,000 dayon sibat.

Si Espina niingon nga ila’ng gipatan-aw sa rouges gallery ang biktima ug niila ni Mancao ug laing lalaki nga naila lang nga Allan. Dali’ng nihimo og hot pursuit operation ang kapolisan ug ila’ng naabtan si Mancao sa ila’ng panimaye ug narekober ang butang nga gikawat.

Matud ni Espina nga si Mancao ang kapila na nila nadakpan sa kaso’ng pagpangawat sa modus operandi nga lipaton ang biktima ug may giatubang na kini nga kaso.

Dali sab nila’ng giduso ang pagpasaka og kaso batok sa suspek samtang gibalhug sa prisohan.

Gitambagan ni Espina ang katawhan nga dili dayon mokagat sa susama’ng estilo sa mga badlungon aron wala’y mabiktima.  (BANAT NEWS)