Biktima sa linog sa Brgy. Luz tabangan ni Tommy

CEBU, Philippines - Duha ka kabus nga pamilya sa Barangay Luz, Dakbayan sa Sugbo kansang panimalay naguba sa linog niadto’ng 2013 wala gyud makapaayo sa kahugnuon na nila nga balay mao nga naluoy si kanhi mayor Tomas Osmeña nga patukuran sila’g balay isip pinaskuhan.

Ang nagsikit nga panimalay nga nalukapa tungod sa linog gipanag-iya sa magtiayong Romeo ug Marlinda Vidal, ingon man ni Raul ug Josephine Vidal, nga nahimutang sa Sitio Santo Niño 2, Barangay Luz.

Matud ni Marlinda nga wala gyud sila’y kuwarta nga ikapatukod og bag-ong balay tungod kay ang iya’ng bana nagtrabaho lang isip pahinante sa construction company nga P250 ra ang sweldo kada adlaw.

Ang magtiayong Josephine ug Raul dugay na nga miguba sa ila’ng balay nga maayong pagkasandig sa silingan nga balay human kini malukapa sa linog.

Kay wala man sila’y kuwarta nga ikapatukod pagbalik og balay, gitanyagan ra sila ni Konsehal Marito Sanchez nga adto papuy-a sa iya’ng balay nga walay nag-estar.

Ang yuta nga giugbukan sa ila’ng panimalay gipanag-iya sa Kapitolyo ug kabahin sa kontrobersiyal kaayo nga 93-1 lots. Adunay tag tulo ka gagmay’ng anak ang magtiayon.

Kini mao’y nakaaghat ni Osmeña nga tabangan niya ang duha ka pamilya nga siya mao’y moabaga sa pagpatukod pagbalik og panimalay alang sa mga biktima sa linog.

Gipasaligan ni Osmeña ang mao nga mga pamilya nga karong sunod semana pasugdan dayon niya sa pagpatukod ang panimalay ug paninguhaon nga kini mahuman sa wala pa’y Pasko.

Si Osmeña nibisita sa Barangay Luz aron sa pagpanglamano sa mga tawo ug nakit-an niya ang nagbahirig na nga gubaong balay sa mga Vidal. Matud ni Osmeña kun dili tabangan ang mao’ng pamilya posible nga mahun-ag ang balay ug madisgrasya pag-apil ang gagmay pa nila’ng anak. (BANAT NEWS)