Kapitolyo wa pay klaro kun may bonus

CEBU, Philippines - Wa pay klaro kun adunay madawat nga bonus karong Pasko ang mga kawani sa Kapitolyo tungod kay nagpaabot pa sila kun tugotan ba sa Malacañang ang maong tinguha.

Matud ni Provincial Budget Officer, Danilo Rodas si Presidente Benigno Aquino III maoy momando ngadto sa Department of Budget and Management (DBM) kun mopagawas og pundo alang sa bonus ug sa mga guidelines niini. Hinuon kung aduna nay pagtugot sa DBM aduna nay  giandam nga P23 milyones ang Kapitolyo alang niini.

Matud ni Rodas nga ang tanang mga incentives nga gi-require sa gobiyerno nahatag na ngadto sa mga kawani.

Ang ulahi mao ang Productivity Enhancement Incentive (PEI) diin imbes nga sa matag buwan sa Disyembre ihatag gipanghatag kini niadto pang buwan sa Hulyo subay sa mando sa pangulo. Niadtong buwan sa Mayo, ang mga kawani sa gobiyerno nakadawat sa katunga sa ilang yearend bonus ug ang laing katunga niini gihatag niadtong buwan sa Nobiyembre.

Gawas sa yearend bonus ang mga kawani nakadawat na usab og cash gift nga P2,500 sa buwan sa Mayo ug laing P2,500 sa buwan sa Nobiyembre dungan kini sa ilang yearend bonus.

Niadtong buwan sa Agosto sa anniversary sa Kapitolyo ang mga kawani nakadawat usab og tag P15,000 nga Collection Negotiation Agreement (CNA). Matud usab ni Rodas nga kasagaran sa mga kawani nagtuo nga Christmas bonus ang ilang madawat sa Disyembre apan ang PEI kini.  (BANAT NEWS)