Pabor-pabor sa CCTO gireklamo
CEBU, Philippines - Nangreklamo ang mga drayber sa pangpubliko’ng sakyanan sa giingong dili patas nga pagpangdakop sa Cebu City Transportation Office tungod sa pagpabor sa pribado nga sakyanan.
Matud ni Jose Jerry Roble, usa ka taxi driver, nga nahiubos siya sa enforcer human siya gidakop samtang ang kadungan niya nga pribado nga sakyanan wala dakpa.
Si Roble nakalapas sa No Left Turn sa dalan B. Rodriguez apan ang kadungan niya nga pribado nga sakyanan ang giingong wala dakpa sa enforcer.
Gipasabot ni Roble nga dili siya supak sa pagdakop kaniya apan buot lang niya nga patas ug wala’y paboran ang pagpangdakop.
Apan si CCTO executive director, Atty. Rey Gealon, niklaro nga wala sila’y gipaboran nga mga sakyanan kun makalapas sa balaud.
Hinuon gihangyo ni Gealon ang mga motorista nga biktima sama sa reklamo ni Roble nga modangop sa iya’ng buhatan aron matabangan aron ma-imbestigar.
Gihagit ni Gealon ang mga motorista nga mosumbong sa lokasyon diin sila nakasugat og mga abusado nga enforcers. (BANAT NEWS)
- Latest
