Libudsuroy pakompisalon sa IEC

CEBU, Philippines - Gipahibalo ni Cebu Archbishop Jose Palma nga adunay mga kabus nga kabataan ilabi na kadtong mga libudsuroy ang maapil sa first communicants  atol sa International Eucharistic Congress nga ipahigayon sunod tuig dinhi sa Dakbayan sa Sugbo.

Matud pa ni Palma, aduna siyay mga pari nga gitahasan aron maoy mangita sa mga bata nga gusto nilang makaapil niini. Sumala pa ni Palma nga moabot sa 5,000 ka mga bata ang gikatakdang mokalawat sa Eukaristiya sa unang higayon ug si Archbishop Emeritus Ricardo Cardinal Vidal ang mopakalawat kanila diha sa Cebu City Sports Center.

Matud pa ni Ricky Ballesteros, executive director sa Sinulog Foundation nga makigtagbo pa siya sa mga sakop sa IEC nga maoy gitahasan sa maong kalihokan aron tukion ang mga angay andamon.

Sumala pa ni Ballesteros, ang Santos nga Misa anha ipahigayon sa football field diin mahimong masulod ang dul-an sa 20 mil ka mga tawo, samtang ang mga delegado adto ipahimutang sa grandstand.

Ang mga mananaog nga dancers sa Sinulog sa Kabataan mopasundayag atol sa maong kalihukan ug tak-opan kini pinaagi sa usa ka fireworks display ilabi na nga mao pa kini ang labing unang higayon nga adunay susamang kalihokan sa CCSC.

Sa laing bahin, posibleng mahuman na lang ang IEC dili pa gihapon matangtang ang  mga punoan sa kahoy diha sa center island sa St. John Paul 2 Avenue, Barangay Mabolo ning Dakbayan sa Sugbo.

Matud pa ni Filemon Embalzado, Eco Management Specialist, sa Department of Environment and Natural Resources (DENR 7) niadto pang adlaw nga Biyernes nakaduso og rekisitos ang dakbayan ug malangan ang pagproseso niini (BANAT NEWS)