‘Botika’ nibaligya sa expired insulin pasirad-an
CEBU, Philippines - Gimandoan sa hepe sa Provincial Health Office, Dr. Cynthia Genosolango, ang hepe sa Tuburan District Hospital nga si Dr. Esteban Ligaray nga ipasira ang tindahan nga giingong nibaligya sa expired nga insulin nga gituohang gikamatay sa usa ka maestra.
Ang tindahan giingong gipanag-iya usab sa usa ka doktor nga nireseta sa tambal.
Apan matud ni Genosolango nga kinahanglan nga mo-coordinate usab si Ligaray sa ubang departamento sa pagsuta kung aduna ba’y mga permits ug legal ba ang operasyon sa botika.
Giklaro sa hepe sa PHO nga sa ila’ng pakisusi, outlet lang sa botika o pundohanan lang og tambal ang tindahan nga gipalitan ug giingong wala kini’y permit nga makabaligya og tambal.
Matud ni Genosolango nga gidili nila ang mga outlet sa botika ug si Dr. Jatoborn Batanagol mao’y nagbutang og mga stocks nga tambal sa mao’ng outlet. Subay niini, gipadala na sa PHO ngadto sa Department of Health-7 ang sobra’ng insulin nga expired na diin gipaubos kini sa eksaminasyon.
Ang nahisgutang insulin gipaubos sa eksaminasyon pagsuta kung duna ba’y contaminant nga mao’y hinungdan sa kamatayon sa pasyente.
Matud usab ni Genosolango nga ang nahitabo sa magtutudlo negligence sa doktor hinungdan nga kini gipa-resign nila kutob niadto’ng Nobiyembre 30. (BANAT NEWS)
- Latest
