Warehouse ni Ouano nasunog

CEBU, Philippines - Naugdaw gyud ang warehouse nga gipanag-iya sa pamilya’ng Ouano sa Barangay Opao, Dakbayan sa Mandaue diha’ng kalit niulbo ang sunog alas 7:20 sa buntag kagahapon.

Si Senior Fire Officer 2 Cefriano Codilla Jr., imbestigador sa Bureau of Fire Protection sa dakbayan, niingon nga giabangan ang bodega sa Red Ribbon, You Resto Bar ug uban pa.

Matud ni Codilla nga pipila ka nakasaksi sa sunog nipadayag nga ang kayo una’ng nagsugod sa ibabaw sa International Kitchenette hangtud nga nikatap sa kinatibuk-ang bahin niini.

Tulo ka opisina ug duha ka warehouse ang naapil sa sunog diin nigamit ang kabomberuhan og breathing apparatus tungod sa kakusog sa aso.

Usa ka fire auxiliary nga si Oscar dela Cruz ang naangol human nasaghiran ang kawayan sa fire scene.

Gibanabana nga mokabat sa P600,000 ang gibilin nga danyos sa sunog.

Nakontrolar ang sunog human sa 11 minutos ug gipaubos sa Task Force Alpha hinungdan sa pagtubag sa kabomberuhan sa Dakbayan sa Sugbo, Lungsod sa Consolacion ug Dakbayan sa Lapu-Lapu.

Si Konsehal Emmarie “Lolypop” Ouano-Dizon nga nahinabi sa mga tigbalita niangkon nga kabahin sa sulod sa nasunog nga bodega mao ang napundo unta nga donasyon alang sa mga biktima sa sunog niadto’ng Sabado sa Sitio Camansi, Barangay Paknaan.

Matud ni Dizon nga nakakuha lang sila og gamay nga dokumento atol sa sunog sa ila’ng opisina.  (BANAT NEWS)