Lapu-Lapu nangandam sa IEC Youth Congress

CEBU, Philippines - Pakigtagboan ni Mayor Paz Radaza ang mga parokya sa dakbayan sa Lapu-Lapu ug sakop sa  Association of Barangay Councils  karong Miyerkules aron tukion ang ilang preparasyon sa Youth Congress nga kabahin sa himuong International Eucharistic Congress karong Enero 28.

Una nang mipadayag si acting police chief Senior Superintendent Armando Radoc nga mo-deploy sila og security personnel sa maong dako nga kalihukan sa kabataan gikan sa nagkalain-laing nasud nga moanha sa siyudad sa maong adlaw.

Dugang ni Radaza, adunay mga grupo sa mga bata nga maoy ilang pasugaton sa mga IEC youth delegates sunod tuig.

"Mag-meeting mi within the six parishes sa city aron mahan-ay ang mga preparations nya naay mga bata gikan sa parish ang mo-welcome sa mga delegates," matud ni Radaza kagahapon.

Matud ni Radaza, adunay impormasyon silang nadawat nga ang IEC Youth Congress anha himuon sa Hoopsdome, Barangay Gun-ob sa maong siyudad. (BANAT NEWS)