23 nasunugan sa paknaan

CEBU, Philippines – Niabot sa 23 ka panimalay ang naugdaw sa sunog sa Zone Kamansi, Eskina Bamo, dalan Plaridel, Paknaan, Dakbayan sa Mandaue kagahapon sa hapon.

Ang alarma nadawat sa kabomberohan alas 2:14 ug nakontrolar alas 2:58 sa hapon diin giisa kini sa Task Force Alpha.

Si Senior Fire Officer 1 Nilo Cosedo, imbestigador sa Bureau of Fire Protection sa Dakbayan sa Mandaue, niingon nga gipaubos sa TFA ang sunog hinungdan sa pagtubag usab sa mga bombero sa Dakbayan sa Sugbo, Lapu-Lapu, Chinese-Filipino Volunteer Fire Brigade, Emergency Rescue Unit Foundation (ERUF), Consolacion, ug uban pa.

Matud ni Fire Officer 2 Roy Garcia nga nagsugod ang sunog sa gituohan nga panimalay ni Lorenso Bonsit apan gisusi pa kung unsa ang tinubdan.

Sumala pa ni Garcia nga gibana-bana nga mokabat ngadto sa P800 mil ang danyos sa mao’ng sunog. Gibutyag ni Garcia nga ang kahagip-ot sa lugar mao’y nakita nila’ng problema sa pagtubag sa alarma hinungdan nga girekomendar na nila ang reblocking sa lugar sa nangagi apan wala pa’y kaugmaran.

Gihimo ang pagsumpaysumpay sa mga hose alang sa pagpaabot sa tubig sa nasunugan samtang wala’y naangol o kinabuhi’ng nakalas sa mao’ng hitabo.

Si Barangay Kapitan Malaquias Soco nibutyag nga ipahimutang ang mga nasunugan sa Bamo Gym ug gipahibawo na usab ang kadagkuan sa Department of Social Welfare and Services alang sa pagkaon sa mga nasunugan.

Gibutyag ni Soco nga makigtagbo pa siya sa mga residente aron tukion ang pag-reblock sa lugar tungod kay gamay ra man ang luna sa mga nasunugan.

Magtagbo usab ang kadagkuan sa barangay Paknaan aron mapaubos nila sa state of calamity ang lugar nga nasunugan. – /GMR) (BANAT NEWS)