Dul-an P1M nalungkab sa managlahi’ng lugar

CEBU, Philippines – Mokabat tunga sa milyon ka pesos ang nakuha gikan sa usa ka Swedish ug usa ka tinun-an sa managlahi’ng bahin sa Dakbayan sa Sugbo.

Ang Swedish naila nga si Vesa Martti Nyman, 56, nagpuyo sa subdivision sa Barangay Capitol Site, kinsa nakuhaan og mga butang nga mokabat sa P400 mil sulod sa panimalay niadto’ng Nobiyembre 24 sa hapon.

Lakip sa mga nakuha ang cellphones ug laptop, mga gamit sa kusina ug uban pa.

Sa pikas bahin, nasikop sa kapolisan ang 22-anyos nga tinun-an nga si Glemar Mier Jacollbe nga nagpuyo sa Kamagong, Lahug, human gitumbok nga nikawat sa mga butang sa 17-anyos nga dalagita.

Ang mga butang naglangkub sa laptop nga kantidad og P59,000, iPhone 5S nga kantidad og P30,000 ug pitaka nga may sulod P1,500.

Samtang nadagit sab ang kapin P300 mil nga balor sa mga gamit ug alahas gikan sa panimalay sa usa ka negosyante sa Bato, Siyudad sa Toledo.

Ang biktima giila nga si Franco delos Reyes, 49, kinsa wala sa iya’ng panimalay atol sa insidente.

Nagtuo ang biktima nga niagi ang kawatan sa luyo’ng bahin sa panimalay ug nilusot sa bintana pinaagi sa pagtangtang sa jalousie blade.

Kapin sab sa P100 mil ang nakuha sa kawatan nga nilungkab sa usa ka panimalay sa Lugo, lungsod sa Borbon diha’ng nilakaw ang tag-iya.   Ang magtiayon nga Lucrecio, 43, ug Cerila Alburo, 43, mga negosyante, niadto sa Dakbayan sa Bogo aron mangompra.

Lakip sa nakawat ang P111,700 nga salapi ug duha ka kwentas nga tag P11mil. – Angelica R.  Libodlibod, USJ-R Communication Intern/GMR) (BANAT NEWS)