TCPS gidayeg tungod sa kampanya vs illegal swertres

CEBU, Philippines – Gidayeg sa presidente sa Association of Barangay Councils (ABC) ang kapulisan sa Siyudad sa Talisay pinangulohan ni Superintendent Germano Mallari tungod sa malampuson niining kampanya batok sa mga operators sa illegal swertres outlets sa siyudad.

Si Kapitan Raul Cabañero, sa Barangay Bulacao nagkanayon nga angay nga moapil sa operasyon ang taga licensing division sa city hall aron nga hingpit gyud mawagtang ang ilegal nga matang sa sugal. Gibarugan ni Cabañero ang iyang pamahayag nga gikinahanglan gyud ang “political will” ni Mayor Johnny de los Reyes sa pagsumpo sa tanang matang nga ilegal kun gusto kining makita nga tinuod nga lider nga may baruganan.

Si Mallari nagpasalamat sa mga opisyal sa barangay sa ilang kooperasyon maong nagmalampuson ang operasyon, apan si Cabañero miingon nga kuwang pa kini.

Apan kun ang mga kapitan gustong wagtangon ang maong matang sa sugal sa ilang mga dapit, ang mayor wa makauyon niini kay alang kaniya mas maayo pa kini itandi sa pagpangubkob og balas sa mga sapa ug pagpamaligya og ilegal nga drugas.

Matud niya panginabuhian na kini ug angay pangitaan og alternatibong panginabuhian sa kapolisan ang mga nanginabuhi niini kun gusto nila kining sikupon. – /EIM) (BANAT NEWS)