Patay’ng lawas nilutaw sa fish sanctuary

CEBU, Philippines – Lalaki nga gituohang miambak sa barko samtang naglawig sa Tañon Straight nakaplagan nga naglutaw sa kadagatan sa Lungsod sa Ginatilan apan patay na.  Si Kapitan Mitchelyn Momo sa Guiwanon, Ginatilan mipahibalo sa kapolisan nga adunay usa ka mananagat sa iyang barangay ang nakakita og naglutaw nga patay nga lawas sa kadagatan.

Ang lawas nakit-an diha sa fish sanctuary sa Guiwanon nga nagsugod na og kadugta.

Ang Municipal Health Officer nga si Dr. Rey S. Jabagat nga mihiling sa lawas mibutyag nga wala nay abaga ug wala nga tiil ang maong patay nga lawas. Gitan-aw karon sa kapolisan kun ang maong lalaki mao ang pasahero nga si Reche Roblico kinsa miambak gikan sa M/V Saint Francis Xavier samtang naglawig kini sa Tañon Straight sa miaging semana nga pabiling missing.

Ang Coast Guard mi-contact na karon sa pamilya ni Roblico aron sa pag-ila  siya ba ang kabanay nga na-missing. – /EIM) (BANAT NEWS)