Expired na ang gi-inject

CEBU, Philippines - Human sa isyu nga mitumaw niining ulahi lang batok sa doktor sa Minglanilla District Hospital , usa ka public school teacher ang namatay sa Tuburan District Hospital tungod sa lain na usab gipasangil nga pagpabaya sa doktor.

Ang namatay mao si Hazel Relavo, 39, taga Barangay 7, lungsod sa Tuburan.  Namatay kini niadtong Nobiyembre 18, 2015 human giingong giturokan og expired na nga insulin sa nurse sa tambalanan sa lungsod.

Si Relavo, giingong diabetic ug gidala kini sa Tuburan District Hospital niadtong Nobiyembre 17, 2015 sa alas-7 sa buntag ug pagka alas -2 sa hapon gi-admit.

Base sa report nga ang doktor sa tambalanan miresita og insulin sa pasyente mga alas 7:00 na sa gabii, apan dihang mobiyahe na padung sa Balamban aron mopalit sa maong tambal ang bana niini nga usa ka seaman gikatahong gipahuwat kini makadiyot sa doktor kay iyang ipasusi sa botika duol sa tambalanan kun duna sila niini nga tambal.

Apan nasayran nga ang maong botika giingong gipanag-iya sa nahisgutang doktor. Tungod kay gikinahanglan dayon ang maong tambal anha na lang nipalit ang bana sa ginang.

Apan nakabantay kini nga ang mga insulin nga baligya sa maong botika gisulod lang  og karton nga unta isulod man kini sa refrigerator aron mapreserba.

Ang nurse nga giingong mi-inject sa insulin ngadto sa pasyente wala usab motan-aw sa label sa botelya una pa niya gi-inject ang tambal sa pasyente. Matud pa ayha lang kini nibasa sa tambal pagkahuman ug diha niini nabasahan nga expired na kini.

Giingong ang nurse nga nag-inject sa insulin igo lang miingon nga “Uy! Na expired na diay na. Pero sige lang ay lang kahadlok kay wa ni effect.”

Pipila ka oras ang nakalabay si Relavo giingong naglisod na sa pagginhawa ug sa dihang gitawag nila ang doktor girekomendar kini dayon pagbalhin og tambalanan sa Dakbayan sa Sugbo.

Ang ginang gidala sa bana sa Chong Hua Hospital kauban ang nurse nga mi-inject sa pasyente sa expired nga insulin, apan pag-abot sa pa lang sa Barangay Busay wala na magginahawa ang pasyente.

Giingong wala kini tabanga sa nurse bisan paghatag og Cardio Pulmonary Resuscitation (CPR) nga normal untang buhaton sa medical attendant ngadto sa pasyente, patay na ang ginang pag-abot sa CHH.

Subay niini, ang bana ni Relavo mipasangil nga walay business permit, license to sell ug license pharmacist ang botika sa doktor.

Dugang pa sa maong report, ang maong doktor nadestino na kaniadto sa Minglanilla District Hospital ug gibalhin sa Tuburan District Hospital tungod sa “malpractice case.”

Ang bana ni Relavo miawhag sa Department of Health (DOH)-7 nga mopahigayon og imbestigasyon sa insidente tungod kay nagplano kining mopasaka og kaso.

Si Dr. Cynthia Genosolango, hepe sa Provincial Health Office (PHO) nagkanayon nga mohimo sila og imbestigasyon sa maong insidente.

Kagahapon sa hapon si Genosolango miadto sa lungsod sa Barili aron mopahigayon usab og imbestigasyon sa laing insidente ngadto sa tambalanan sa nahisgutang lungsod.

Si Amancio Ubas, Jr. 23-anyos taga Barangay Gunting, Barili kinsa nakasinati og disgrasya sa motorsiklo namatay niadtong Domingo sa gabii tungod kay giingong wala dayon atimana sa mga medical staff sa tambalanan.

Si Ubas nabalian sa walang bitiis giingong nahutdan og dugo tungod kay wala magtagad ang tambalanan aron madala kini dayon sa tambalanan sa Dakbayan sa Sugbo, kay ang medical staff  di mosugot kun way consent sa mga paryente sa pasyente.

Ang uyoan sa biktima nga si Noli Tampus miingon nga sila pay gibasol sa medical staff kun nganong dugay silang naabot.

Matud ni Tampus nga wala sila makahibawo dayon nga nadisgrasya ang iyang pag-umangkon samtang paingon nga mokuha sa iyang asawa nga nagtrabaho sa usa ka department store diha sa Dumanjug.

Matud ni Tampus nga dihang nagkasabot na sila nga dalhon sa tambalanan sa dakbayan sa Sugbo si Ubas walay ambulansiya nga magamit ang tambalanan.

Naghuwat pa sila sa ambulansiya gikan sa Barangay Patupat, Barili ug pag-abot sa ambulansiya wala dayon sila makabiyahe tungod kay ang doktor adunay giatiman nga laing pasyente.

Apan ang maong mga pasangil ni Tampus gihimakak sa mga nurse sa maong tambalanan kay matud nila nga 50-50 nang daan ang pasyente dihang naabot sa hospital.  (BANAT NEWS)