3 priso nakaeskapo

CEBU, Philippines - Tulo ka mga priso sa Carcar City Jail ang nakapuga alas-6 sa gabii adlaw nga Martes human nila gisilihan ang jailguards, apan usa kanila nadakpan dayon sa mga otoridad.

 Ang mga nakaikyas mao sila si Junard Ramos, taga lungsod sa Barili nga  dunay kasong carnapping sa Dakbayan sa Carcar, Rodelio Apura, taga Barangay Liboron sa Dakbayan sa Carcar nga adunay kaso sa drugas.

Samtang ang  nadakpan pagbalik naila nga si Genson Dawat, taga Barili  ug adunay duha ka kasong rape.

Matud pa ni Mayor Nicepuro Apura, si Jail Warden Roger Daligdig nagkanayon, naghipos sa kinan-an nga rasyon ang mga gwardya niadtong tungora.

Apan sa ilang pagsulod sa gate kalit nga gibubuan sa mga nipuga nga priso og tubig nga dunay gipusa nga sili ang jailguard dayong dasmag ug nisibat.

Nasikop hinuon dayon si Dawat kay nilayat man kini gikan sa second floor apan napiangan ug wala na makadagan og layo.

Dili pa dugay ang City Jail sa Carcar tungod kay niadtong 2013 pa kini giinugurahan human gigahinan og P11milyones sa siyudad.

Ang  prisohan wala pay lig-on nga koral ug gigamitan lang kini karon og barbed wire kay sunod tuig pa kini sementuhon.

Adunay upat ka mga closed-circuit television camera ang prisohan nga gigamit aron pagpaniid sa mga priso ug seguridad sa pasilidad.

Tungod sa maong hitabo, idili na sa mayor ang pagpasulod og sili sa maong prisohan.

Gimando usab ni Apura ang manhunt operation batok sa duha nga nakaeskapo.

Suway nga gibisita sa Banat News ang Carcar City Jail apan walay bisan usa sa ilang mga opisyal ang nihatag og pamahayag kabahin sa hitabo. (BANAT NEWS)