Media nagbagulbol batok DPWH-7

CEBU, Philippines – Kasagmuyo mao’y nipatigbabaw sa mga sakop sa media kagahapon sa buntag atol sa imbitasyon sa Department of Public Works and Highways may kalabutan sa inspection sa mga establesemento nga naa nahimutang sa dalan B. Rodriguez, Dakbayan sa Sugbo.

Kini tungod kay dul-an sa duha ka oras nga nagpaabot ang mga sakop sa media apan ang gitahasan sa kalihukan nga usa ka Thelo Cardente ang wala nagpa-interbyu ug pipila ka gutlo kalit kini’ng nibiya sa lugar nga biniyaan ang iya’ng mga dala nga trabahante.

Pagbagulbol ang napakita sa mga sakop sa media tungod kay daghan nga mga coverage nga ila’ng nabiyaan tungod sa imbitasyon apan wala’y nakahatag sa pamahayag.

Usa niini si Ryan Sorote sa TV5 Cebu kinsa nasagmuyo nga wala’y nakahatag nila og pamahayag on camera nga nagpaabot sila og duha ka oras.

Samtang si Alan Domingo sa GMA7 nipadayag nga respetuhay lang unta tungod kay ang DPWH-7 maoy nangimbitar ug niabot sila sa wala pa sa oras nga gikatakda.

Pag-abot sa representante sa DPWH-7 giingong wala kini nanaug sa iya’ng sakyanan ug sa diha’ng giduol sa mga tigbalita nanira kini ug pipila ka gutlo nipaandar sa sakyanan ug nibiya sa lugar.

Si Aubrey Paronda sa DPWH-7 nibutyag nga gusto nila’ng masayran ang tinuod nga mga pangalan sa establesemento nga nakalapas sa karsada aron mahibaw-an nila kinsa ang mapasakaan og kaso. – /GMR) (BANAT NEWS)