Urban poor sa siyudad nisuporta sa moratorium

CEBU, Philippines – Mga grupo sa urban poor sa Dakbayan sa Sugbo naghugpong ug mipadangat sa ilang suwat ngadto sa konseho pagsuporta nga ipapasar ang ordinansahon nga nagmando og moratorium sa tanang demolisyon nga gi-veto ni Mayor Michael Rama.

Ang suwat gipadala ngadto sa buhatan sa mga konsehal niadtong Lunes diin ilang gipaabot ang ilang kahiubos ug kasagmuyo kang Rama nga gi-veto niini ang maong ordinansa nga giduso ni Konsehal Alvin Dizon. Gikalipay nila ang maong ordinansa tungod kay dili na panggub-on ang ilang mga pinuy-anan nga nahimutang sa pampublikong yuta. Kahinumdoman nga sagunson ang mga demolisyon nga gihimo sa siyudad diha  sa Barangay Capitol Site ug sa Doña Pepang Cemetery sa Barangay Tejero.

Ila usab gisaway ang mga programa ni Rama nga pagpanindot sa palibot sa siyudad tungod kay matud nila nakadaot kini sa kinabuhi sa mga kabus. Gusto nila nga kun papahawaon man sila sa ilang mga dapit, dili unta basta lang silang abugon nga walay kapaingnang relokasyon. Karong adlawa gipaabot nga magbotasyon ang konseho bahin sa pag-veto ni Rama sa moratorium. – /EIM) (BANAT NEWS)