Mayor, BM sa barili nag-ilog sa SB Sec
CEBU, Philippines – Nag-ilog sila si Barili Mayor Teresito Mariñas ug Bise Mayor Jose Antonio Nemeño, pulos sakop sa Liberal Party, kung kinsa ang motudlo sa Sangguniang Bayan secretary.
Si Mariñas buot nga ang igsuon nga si Aniceto ang matudlo subay sa rekomendasyon sa Personnel Selection Board.
Apan si Nemeño kinsa adunay gahum sa pagtudlo nitudlo kang Catherine Candilada ug kini gikompirmar sa SB niadto’ng Nobiyembre 4, 2015. Human niini si Mariñas nimando kang Alma Tigley, ang designated human resource management officer, nga pugngan una ang paghikay sa papeles ni Candilada.
Apan si Nemeño pagkasunod adlaw nimando usab kang Tigley sa pag-andam na sa appointment ni Candilada.
Giuli ni Mariñas ang resolusyon sa SB nga nagkompirmar ni Candilada nga wala niya pirmahi.
Matud ni Nemeño nga out of courtesy lang ang ila’ng gihimo sa paghatag og kopya sa resolusyon sanglit dili na kinahanglan ang pirma sa mayor.
Gipasabot ni Nemeño nga ang rekomendasyon sa PSB kang Aniceto mahimo o dili niya ikonsiderar isip siya ang appointing authority.
Gipahimangnoan ni Nemeño si Mariñas sa kaso ni Dumanjug Mayor Nelson Garcia kinsa nasuspenso gumikan sa reklamo ni Bise Mayor Efren Guntrano Gica sa pagtudlo og SB secretary. (BANAT NEWS)
- Latest
