Di mag-helmet dakpon bisan pa’g sila Team Rama

CEBU, Philippines - Ang campaign manager sa Team Rama, ang politikanhong pundok nga gipangulohan ni Mayor Michael Rama, mimando sa mga traffic enforcers nga dakpon ang ilang mga dumadapig kun masakpan sila nga magsakay’g motor ug wala’y helmet.

Si Cebu City Councilor Ritchie V. Osmeña miingon nga wala’y labaw sa balaod ug wala nila sugoa ang mga dumadapig sa Team Rama nga dili magsul-ob og crash helmet sa ilang pagsakay’g motor nga miuban sa motorkada kaniadtong Biyernes.

Mga alyado sa Team Rama naghimo og caravan sa lainlaing kadalanan sa dakbayan sa Sugbo diin sakay ang ilang kandidato, usa niini ang anak ni Vice Mayor Edgardo Labella nga nagpapili pagka konsehal.

Uban sa caravan mao ang daghang mga nanagsakay og motorsiklo ug nagsul-ob og yellow nga jacket nga minarkahan og Team Rama ug wala magsul-ob og crash helmet nga maoy gimando sa balaod.

Bisan si CCTO Department Head Rafael Yap miingon nga angayan gyud nga dakpon sa mga traffic enforcer kadtong maong mga wala magsul-ob og helmet nga miuban sa caravan.

Matud ni Yap nga bisan si Mayor Michael Rama mibaod gyud sa ilang mga dumadapig nga motuman gayud sa balaod.

Ang mga traffic enforcers hinuon miingon nga lisud kaayo alang kanila ang pagdakop tungod kay hilabihan nila ka daghan ug pipila ra ka traffic enforcers ang gidistino sa usa ka dapit.

“Angay g’yud unta nga ang tigpasiugda sa mao nga caravan maoy mobadlong sa ilang mga kauban nga dili maayo tan-awon nga magsakay sila og motorsiklo nga dili magsul-ob og helmet kay matan-aw nga sila masinupakon sa balaod,” matud sa usa ka traffic enforcer.  (BANAT NEWS)