Automatic Tubig Machine (ATM)Sinulat ug hulagway

CEBU, Philippines – Bisan asang suok dinhi sa Metro Cebu ingon man sa kalungsuran ug dakbayan sa lalawigan sa Sugbo, makita ang nagkadaiyang dagway, porma ug bulok sa mga hulog-hulog piso nga water dispensers nga mas naila sa tawag nga Automatic Tubig Machine (ATM).

Nagsugod kining mao nga ginagmay’ng negosyo niadtong early 2000s. Sayon ra kaayo kining i-operate ug bisan bata makamao niini basta makaabot lang sa gamay'ng buslot nga hulganan sa piso samtang nagsawod sa tubig nga moagas sa gamay nga "noozle".

Kun wala kay limpyo nga kasudlan sa tubig, ayaw kabalaka kay kasagaran sa mga nag-operate niining mga ATM, magbutang sila og limpyo nga plastik aron adunay magamit ang ilang mga gipang-uhaw nga kustomers.

Makalingaw ang ubang water dispensers kay gawas sa ilang lainlaing kolor, adunay mga unique ang porma o desinyo. Sama sa paggamit sa logo sa sikat nga brand sa mga gadgets, water drop, crescent ug uban pa.

Makalingaw usab tan-awon ang ATM nga gisunod sa iho o dolphin. May disenyo sab gani nga sama sa payloader ug ice cream cart.

Si Elmer Mosquite sa Eljing Refrigeration and Airconditioning nga tighimo og ATM sulod na sa 10 ka tuig, miingon nga kuti ang paghimo niini apan mag-agad ug  igo ra sila mosunod sa gusto sa kustomer. Pagkakaron, makita ang ilang simple nga design diha sa Natalio Bacalso Avenue habig sa Brgy. Lawaan 1 sa dakbayan sa Talisay. Madani gyud pagtan-aw ang mga mangagi tungod sa ka-colorful sa ilang dispensers. Tag P12 mil ang baligya ni Elmer sa matag unit sa ATM ug apil sa ilang package ang unom ka buwan nga lock-in period diin sila maoy mo-supply og purified water sa nipalit sa ilang unit.

Affordable tuod ug madalidali ra ang ATM kun maabtan ka sa kauhaw samtang anaa ka sa dalan kun itandi sa ice water. Apan safe ba ang tubig niini? Kasagaran sa mga ATM naggamit og purified o mineral water.

Wala pay giumol nga balaod sa Talisay alang sa pag-operate sa mga ATM's, dili sama sa dakbayan sa Sugbo nga kinahanglan na nga molukat og permit gikan sa City Health Department kadtong gusto nga mo-operate.

Kini gihimo human sa usa ka insidente diin ang biktima nakainom og kontaminado nga tubig gikan sa ATM.

Kinahanglan nga ang ATM duna gyuy magbantay aron mamintenar ang kalimpyo niini ug mailisan dayon ang galon sa panahon nga mahutdan kini'g tubig.

Gani matud sa mga estudyante nga nahinabi ning tagsulat, dili gyud sila magpataka og inom sa ATM aron dili masakit.

Nahimo na nga negosyo sa uban ang ATM. Giingong ang usa ka unit niini nga ibutang sa lugar nga daghang tawo, sama sa kan-anan o terminal, makahurot og tulo ngadto sa upat ka galon sa tubig kada adlaw.  Samtang sa mingaw nga dapit, duha ngadto sa tulo ka galon ang mahurot. Kaayo na niini di ba?  Ang usa ka galon mokita og dili momenos P60 ngadto sa P70. Ingon bitaw ang panultihon nga bahala'g gamay basta kanunay. (BANAT NEWS)