Donasyon alang sa IEC 2016 miabot na og P60 milyones
CEBU, Philippines – Miabot na og P60 milyones ang natigom alang sa International Eucharistic Congress nga ipahigayon dinhi sa Sugbo sa sunod tuig Enero 24-31, 2016 ug gisiguro usab ang seguridad sa naasoy’ng kalihukan.
Gipadayag ni Auxiliary Bishop Dennis Villarojo nga dili angay mokompiyansa sa mga posibleng panghitabo nga motumaw maong nakig-alayon sila sa mga otoridad aron masiguro nga luwas ang mga delegado.
Gidugang sa obispo daghan nang mga nasud ang nipadayag sa ilang tinguha nga moapil sa IEC ug gikatakdang magparehistro sa dili pa mahuman ang tuig.
Sa pikas bahin giklaro sa obispo nga ang P60 milyones nga natigom gikan sa mga donasyon , nagasto na usab alang sa pagpangandam.
Aduna pay mokapin sa P200 milyones nga gikinahanglan alang sa maong kalihukan. Apan masaligon ang obispo nga makab-ot nila kini sanglit aduna may mga pledges sa mga donors.
Nanawagan karon si Villarojo sa tanang katawhan nga mag-ampo alang sa kalampusan sa maong dakong kalihukan nga ipahigayon dinhi sa Sugbo. (BANAT NEWS)
- Latest
