DENR nabalaka, nagpatabang sa mga polis

CEBU, Philippines - Gihangyo sa Department of Environment and Natural Resources (DENR)-7 ang kapolisan nga hatagan og seguridad ang ilang mga kawani sa Mabinay, Negros Oriental human sa nahitabo nga pinusilay didto sa ilang  compound kaniadtong Huwebes.

Hangtod kagahapon ang kadagkoan sa DENR-7 dinhi sa Sugbo wala pay kompleto nga detalyi kabahin sa hitabo. Ang tigpamaba sa DENR nga si Eddie Llamedo nangayo na og report sa kapolisan.

Upat ka sakop sa Bais Civil Security Office ang napatay sa nahitabong shootout batok sa kapolisan niadtong Miyerkules sa hapon. Tulo usab ka polis ang nangaangol.

Ang upat ka napatay miadto sa DENR Office sa Mabinay aron kuhaon ang chainsaw nga gigamit sa illegal logging didto sa reforestation area nga gisakmit sa mga forest guards.

Ang taga DENR nakapangayo’g tabang sa kapolisan apan pag-abot sa mga polis nanukol ang upat ka armadong tawo. (Decemay P.  Padilla/RUB)(BANAT NEWS)