Dugang ambulansya ug sakyanan pamaliton

CEBU, Philippines - Gisugyot sa Cebu City Development Council (CCDC) nga ang dakbayan mopalit og dugang 18 ka emergency rescue vehicles nga kantidad og P16.3 milyones aron moserbisyo sa katawhan dinhi sa siyudad.

Pagka karon, ang dakbayan sa Sugbo adunay 32 ka ambulansya kon emergency rescue vehicles nga ang uban anaa gipadumala sa lainlaing barangay. Sigun sa dukomento nga giduso sa CCDC didto sa Konseho sa Dakbayan nga ang matag ambulansya mokantidad og P910 mil. Si Konsehal Dave Tumulak, presiding officer sa City Disaster-Risk Reduction Management Council misuporta sa pagpamalit niining mga ambulansya.

Matud ni Tumulak nga ang mga personnel sa barangay nga adunay rescue vehicle gidid-an nila pag-transport sa mga delikado na kaayo nga pasyente kay nagkinahanglan na kini og igo nga kasinatian.

Ang kadagkoan sa barangay giawhag lang sa pagkontak sa City Communication Center (C3) aron maoy mokontak og ambulansya nga ipadala sa dapit nga adunay panginahanglan.

Matud ni Tumulak nga ang Emergency Rescue Unit Foundation (ERUF) apil nga ilang kontakon pananglit duol sila sa dapit nga respondehanan og ambulansya.

Nahibaw-an nga P108 milyones ang gigahin nga budget sa CCDC alang sa pagpalit og kahimanan kabahin sa Peace and Order. Kini maglakip sa 28 ka shuttle van patrol (P26M), 15 ka dagkong motor (P6.7M), 18 ka multi-purpose vehicle (P21M), pito ka pick-up vehicles (P11.2M), upat ka Sports Utility Vehicles (P6.2M).

Si Engr. Kenneth Carmelita Enriquez, secretary sa CCDC, miingon nga ang uban sa maong mga sakyanan, gi-request ni Cebu City police director Marciano Batiancila. (Rene U. Borromeo)(BANAT NEWS)