Mayor Rama nahutdan na’g pailob, mokiha na

CEBU, Philippines - Gibutyag ni Mayor Michael Rama nga naupos na ang iyang pailob ug giandam na nila ang mga kaso nga ipasaka batok sa mga tawo nga mipasangil nga siya mogamit og gidili nga drugas.

Giangkon ni Rama nga anam-anam na siya nga nasakitan, labaw na ang iyang mga kabanay, tungod kay matud niya nasayod sila nga dili tinuod nga mogamit siya’g ilegal nga drugas.

Wala hinuon ibutyag ni Rama kun kinsa ang mga tawo nga giandaman niya’g mga kaso nga Libel tungod sa pagdaot sa iyang dungog aron nga mabentahaan siya sa eleksyon.

Si Rama ug kanhi mayor Tomas R. Osmeña magsangka na usab pagka mayor sa dakbayan sa Sugbo atol sa eleksyon karong Mayo 9 sunod tuig.

Si Osmeña hinuon kusganong nanghimakak nga may kalabotan siya sa giingong pagpakatap og mga leaflets nga nagpasangil nga drug user ang mayor.

Ang mayor miingon nga ang pagniwang karon sa iyang panglawas kabahin sa iyang pagkontrolar sa pagkaon aron dili siya makaangkon og sakit.

Matud ni Rama nga dihang misulod siya sa politika, gihugot niya ang iyang bakus aron makadawat sa mga pagsaway batok kaniya.

Apan iyang natimbang-timbang nga ang pagpasangil nga siya tiggamitan og ilegal nga drugas ug maoy rason nga siya miniwang, subra na usab kaayo ug wala na niya ikalipay.

Si Rama kaniadto mipasaka usab og kaso nga Libel batok sa tawo nga mipasangil kaniya nga supporter og druglord, apan sa ngadto-ngadto gipasaylo ra usab ni Rama ang iyang gikiha. (Rene U. Borromeo)(BANAT NEWS)