Nisukol o wala?

CEBU, Philippines - Gireklamo sa usa ka inahan ang tulo ka polis sa Malabuyoc kay nagduda siya nga gituyo pagpatay ang iyang anak ug wa kini mosukol kanila niadtong Oktobre 21.

Si Gloria Allosada, 56, midangop sa buhatan sa Regional Investigation and Detective Management Division 7 aron  moreklamo.

Saysay ni Allosada nga ang iyang anak nga si Genesis, 25, napatay sa mga polis sa Malabuyoc ug ilang gipalakaw nga estorya nga misukol kini.

Namista iyang anak  sa Poblacion 2 sa Moalboal apan pagkakita niini sa mga polis midagan kini kay usher man kini sa illegal nga swertres apan gilain og sabot sa mga polis ug gipusil kini.

 Sumala pa niya nga nakatawag pa niya ang iyang anak ug misulti kini nga “Ma gipusil kong Iran,” ug sunod niyang nadungog ang tingog sa iyang anak nga nagtinga.

Dugang pasangil ni Allosada, dihang tabangon unta sa iyang live-in-partner ang iyang anak aron dad-on sa tambalanan giingnan siya ni SPO2 Edward Villarte nga dili paduolon kay ilang “tiwasan.”

Si Senior Superintendent Rey Lyndon Lawas, hepe sa Regional Directorial Staff miingon nga iyang paimbestigahan sila si SPO2 Edward Villarte, PO2 Diosdao Iran, ug PO1 Jomar Gonzalo lakip na ilang hepe nga si Inspector Andres Alpas.

Ang inahan miingon nga miadto sila sa police station niadtong Oktubre 22 aron magpa-blotter sa hitabo apan gibalibaran sila ug giingnan silang “lisod sila’ng tuohan.” (BANAT NEWS)