Kanhi polis, pito sikop

CEBU, Philippines - Walo ka lalaki apil ang usa ka kanhi polis ang nasikop lakip na ang subject sa gipahigayon nga buy-bust operation sa mga sakop sa National Bureau of Investigation-7 diha sa Sitio San Roque, Barangay Capitol Site, ning Dakbayan sa Sugbo pipila lang ka metros gikan sa ilang buhatan.

Ang subject sa maong buy-bust mao si Joel Dizon Cabizas, 41, usa ka computer technician. Samtang ang laing nasikop mao si Kimpoy Sayaboc, 20, tattoo artist; Michael Muvano, 20; Roy Muyano, 23; Felipe Gelig, 39; Adrian Lagunda, 38; Danilo Palileo,  ug usa ka kanhi polis nga si Albert Makinano.

Matud pa ni Special Investigator Agapito Gieran, nakadawat sila og impormasyon duha ka semana na ang nilabay nga dunay namaligya og drugas  ug nag- operate og drug den pipila lang ka tikang gikan sa ilang buhatan hinungdan nipahigayon sila og surveillance. Dihang ilang nakompirmar ang report mihimo sila dayon og buy-bust operation nga miresulta sa pagkasikop sa mga suspek.

Nakuha gikan sa posisyon ni  Cabizas ang upat ka gagmay sa gituohan nga shabu, kagamitan sa pagamit sa drugas ug ang laing usa ka gamay nga pakete sa shabu nga subject sa buy-bust og ang P200 nga buy-bust money.

Gibutyag ni Gieran, posibleng pasakaan nila og kasong visiting drug den ang laing mga dinakpan atol sa gipahigayon nga buy-bust. Apan si Cabizas, sa iyang bahin  nihimakak nga namaligya siya og drugas. (BANAT NEWS)