Maestra ipaimbestigar
CEBU, Philippines - Nagsugod na ang Department of Education sa paghimo’g imbestigasyon sa gikataho nga usa ka maestra midagmal sa iyang tinun-an pinaagi sa paglabay og kahoy nga jalousie ngadto sa nawong sa bata.
Gimandoan ni DepEd provincial superintendent Rhea Mar Angtud ang investigating team nga dalion ang paghuman sa imbestigasyon sa kaso sa substitute teacher sa Langtad (Argao) Elementary School.
Ang 11-anyos nga bata nga tinun-an sa Grade 4 nakaangkon og bun-og dapit sa iyang mata. Apil nga pangutan-on ang mga kaklase sa biktima aron pakisayran sa mao nga hitabo.
Ang pasiuna nga report nagkanayon nga nasuko ang maestra sa biktima kay wala kini maminaw mao nga mikuha kini og kahoy ug gihapak sa bungbong apan didto mibanda sa bata.
Matud ni Dr. Angtud bisan og unsa pa ang intensyon sa magtutudlo wala kini katungod nga mopagawas sa iyang emosyon sulod sa klase nga moresulta sa pagpasakit sa tinun-an.
Ang kadagkoan sa DepEd nagkanayon nga kun mapamatud-an nga sad-an ang 25 anyos nga magtutudlo hayan dili kini ma-regular ug mas maayong mangita na lang og laing trabaho.
Apil nga susihon ang report nga daghan pa nga tinun-an ang pisikal nga napasakitan sa maong magtutudlo. Ang maestra hinuon hatagan og due process atol sa imbestigasyon.
Gani gusto ni Angtud nga personal niyang mahinabi ang gireklamong magtutudlo. (BANAT NEWS)
- Latest
