Gipatay gisud sa baril

CEBU, Philippines - Gidudahang kawatan gipatay ug gisulod sa baril  sa usa ka carwash shop diha sa Kimba Cansojong, dakbayan sa Talisay kagahapon sa kaadlawon.

Padayon pang giila sa kapolisan ang pagkatawo sa biktima kinsa gikatahong nadunggaban sa caretaker nga si Alenader Barasil, 19.

Si Barasil gitahan sa iyang agalon human kini mitug-an sa nahitabo ug gitultolan kun asa niya gitago ang lawas sa biktima.

Si Senior Police Officer 1 Mikie Espina, imbestigador sa Talisay City Police nagkanayon nga ang suspek nangangkon nga natulog kini  dihang nakabantay nga adunay duha ka wa mailhing lalaki nga nisulod sa ilang shop.

Matud pa ni Espina, ang namatay nisulod sa bunkhouse ni Barasil ug gikulata siya niini, apan nisukol kini ug nailog ang hait nga hinagiban ug maoy gisumbalik og hansak ngadto sa maong lalaki hinungdan sa kamatayon niini.

Ang kauban sa namatay daling nigawas sa shop human niini nakita nga napatay sa suspek ang iyang kauban. Tungod sa kahadlok ni Barasil, iyang gisulod sa baril ang biktima ug pagkabuntag  mitug-an kini sa agalon nga si Mauri Azis kinsa nipahibalo dayon sa mga otoridad.

Matud pa ni Espina nga pasakaan nila og kaso ang suspek ug adto na lang kini manubag sa korte kun matawag bang self defense ang iyang gibuhat. (BANAT NEWS)